Служба священномученику Владимиру Хираско,
новомученику земли Белорусской
Память празднуется:
28 октября- день прославления.
2002 год от Рождества Христова.
г. Минск
По благословению Высокопреосвященнейшего Филарета
митрополита Минского и Слуцкого, Патриаршего Экзарха всея Беларуси.
Вечера на Господи воззвах, стихиры, глас 1.
Подобен: Всехвальнии мученицы:
Богомудре блаженее, Владимире, очервленьми твоея крове, священную твою и божественную одежду уяснил еси: от силы бо благочестно в силу, и от славы в славу прешел еси. И ныне молися, даровати душам нашим мир и велию милость.
Жертву первее Богу принося безкровную, яко священник законнейший, яко всеплодие и приятну жертву, тебе самаго кровию, яко мученик истиннейший, послежде Христу принесл еси, богоглаголиве всечестне: Егоже моли о поющих тя.
Мученик воинства Христу, отче привел еси, учении твоими и наказании, уча и наказуя, и яве образ богомудре тебе самаго предлагая. С нимиже молися, даровати душам нашим мир и велию милость.
Слава Отцу и Сыну и Святому Духу, и ныне и присно, и во веки веков. Аминь.
Богородичен:
Прегрешений
пучиною обуреваем, к тихому пристанищу Твоея пречистыя мольбы Богородице
прибег, взываю Ти: спаси мя, державную Твою простерши десницу рабу Твоему,
Пренепорочная.
Крестобогородичен:
У Креста предстоящи Сына и Бога Твоего, и долготерпение Того смотряющи,
глаголаше плачущи Мати Чистая: увы Мне Чадо сладчайшее, что сия страждеши
неправедно Слове Божий; да спасеши человечество.
Аще имать самогласен:
Слава
Отцу и Сыну и святому Духу,
Глас 6
Священник законнейший, даже до кончины твоея был еси, блаженне Владимире:
священнодействуя бо Божественная и неизглаголанная таинства, кровь излиял
еси за Христа Бога, и жертву благоприятну себе привел еси. Тем дерзновение
имея к Нему, прилежно молися с верою и любовию совершающих твою пречестную
память, и почитающым сию избавитися напастей, и всяких бед и обстояний.
И ныне и присно и во веки веков. Аминь.
Богородичен:
Бога из тебе воплотившагося разумехом, Богородице Дево, того моли о спасении
душ наших.
Крестобогородичен:
Видяще Тя распинаема Христе Тебе рождшая, вопияше: что странное еже вижу
таинство, Сыне Мой; како на древе умираеши плотию повешен, жизни подателю.
Зри аще празднуеши с полиелеем, и ты глаголи Богородичен воскресный:
Кто Тебе не ублажит.
Вход. Прокимен дне. Чтение три святительская:
Притчей чтение:
Память праведнаго с похвалами, и благословение Господне на главе
его. Блажен человек, иже обрете премудрость: и смертен, иже уведе разум.
Лучше бо сию куповати, нежели злата, и сребра сокровища. Честнейшая же
есть камений многоценных: все же честное недостойно ея есть. Долгота бо
дней, и лета живота в деснице ея: в шуйце же ея богатство, и слава. От
уст ея исходит правда, закон же и милость на языце носит. Послушайте убо
мене, о чада, честная бо реку, и блажен человек, иже пути моя сохранит:
исходи бо мои, исходи живота, и уготовляется хотение от Господа. Сего
ради молю вас, и прелагаю мой глас сыновом человеческим: яко аз премудрость
устроих, совет и разум и смысл аз призвах. Мой совет и утверждение, мой
разум, моя же крепость. Аз мене любящыя люблю, ищущии же мене обрящут
благодать. Разумейте убо незлобивии коварство, ненаказаннии же прилагайте
сердца. Послушайте мене и паки, честная бо реку: и отверзу от устен правая,
яко истине поучится гортань мой: мерзски же предо мною устны лживыя. С
правдою вси глаголы уст моих: ничтоже в них стропотно, ниже развращенно.
Вся права суть разумевающым, и проста обретающым разум. Научу бо вас истине,
да будет о Господе надежда ваша, и исполнитеся Духа.
Премудрости Соломоновы чтение:
Уста праведнаго каплют премудрость: устне же мужей мудрых, ведать
благодать. Уста мудрых поучатся премудрости, правда же избавляет от смерти.
Скончавшуся мужу праведну, не погибнет надежда, Сын бо праведен рождается
в живот:и во благих своих, плод правды обимет. Свет праведным всегда,
и от Господа обрящут благодать и славу. Язык мудрых добрая совесть, и
в сердце их почиет мудрость. Любит Господь преподобные сердца, приятнии
же Ему вси непорочнии в пути. Мудрость Господня просвещает лице разумнаго.
Постигает бо желающыя ю, прежде даже резумети ю, и удобь узрится от любящих
ю. Утреневавый к ней не утрудится: и бдяй ея ради, вскоре без печали будет.
Яко достойных ея сама обходит ищущи, и в стезях ея является им благоприемне.
Мудрости никогдаже одолеет злоба: сих ради и рачитель бых доброты ея:
и возлюбих ю, и поисках от юности моея. И взысках невесту привести себе,
яко всех Владыко возлюби ю. Таибница бо есть Божия хитрости, и обретательница
дел его. Труды ея суть добродетели: целомудрию и разуму тя учит, правде
и мужеству, ихже потребне ничтоже есть в житии человеком. Аще же и многаго
искусства желает кто, весть древняя, и быти хотящая разсмотрит: совесть
извития словес, и разрешения гаданий: знамения и чудеса проразумеет, и
сбытия времен и лет: и всем советник есть благ, яко безсмертие есть в
ней, и благославие во общении словес ея. Сего ради беседовах ко Господу,
и помолихся Ему, и рех от всего сердца моего: Боже отцев и Господи милости,
сотворивый вся словом твоим, и мудростию твоею устроивый человека, да
владеет бывшими от тебе тварьми, и да управляет мир в преподобнии и правде.
Даждь ми Твоих престолов приседящую премудрость, и не отлучи мене от отрок
Твоих, яко аз раб Твой, и сын рабыни Твоея. Посли ю с небес от святаго
жилища Твоего, и от престола славы Твоея, да Сущи со мною научит мя, что
благоугодно есть пред Тобою: и наставит мя в разум, и сохранит мя в славе
Своей. Помышления бо смертных вся боязлива, и погрешительна умышления
их.
Премудрости Соломоновы чтение:
Похваляему Праведнику, возвеселятся людие: безсмертие бо есть память Его,
яко от Господа познавается, и от человек: и угодна Господеви душа Его.
Возлюбите убо, о мужие, мудрость, и поживете: восхощите ея, и наказани
будете: начала бо ея любы, и соблюдение закона. Почтите премудрость, да
во веки царствуете. Возвещу вам, и не скрыю от вас таин Божиих: яко Той
мудрости Наставник есть, и мудрых Исправитель: и всякому смыслу и делу
Хитрец. И всем смыслом научит мудрость, есть бо в ней Дух разумен и свят,
и сияние света присносущаго, и образ благости Божия: та други Божия и
пророки устрояет. Благолепнейши же есть солнца, и паче всякого сотворения
звезд, свету сосуждаема, обретается Первейши. Та угождающих ей от болезней
избави, и настави на стези правыя: даде им разум имети свет, и сохрани
я от ловящих, и подвиг крепок подаде им. Да разумеют вси, яко сильнейши
всего есть благочестие:и никогдаже преможет злоба мудрости, ниже прейдет
злыя обличающи суд. Рекоша же в себе, помысливше неправедно, насильствуем
Праведному, и не пощадим преподобства Его, ни усрамимся седин старости
многолетны. Будет бо нам крепость закон: и уловим Праведнаго, яко неугоден
нам есть, и противится делом нашим, и поносит нам отпадение закона, и
обличает нам согрешения наказания нашего. Возвещает нам разум имети Божий,
и Отрока Господня Себе именует. Бысть нам на обличение помышлением нашим,
и тяжек нам есть, и видим, яко неподобно иным житие Его и изменены стези
Его, в поругание вменихомся Ему: и удаляется от путей наших яко от нечистот,
и блажит последняя праведных. Увидим убо, аще словеса Его истинна суть,
искусим яже сбываются Ему. Руганием и мукаю истяжаем Его, да разумеем
кротость его, и искусим беззлобство Его, смертию безобразною осудим Его:будет
бо посещение от словес Его. Сия помыслиша, и прельстишася: ослепи бо я
злоба их, и не разумеша таин Божиих, и не разсудиша яко Ты есть Бог един,
живота имеяй и смерти власть: и спасаяй бо время скорби, и избавляяй от
всякаго зла. Щедр и милостив, и дая преподобным своим благодать, и своею
мышцею гордым противляяся.
На стиховне стихиры. Глас 6
Кровию обагрив твою священную одежду, вшел еси во святая святых, свят
ты быв, Владимире, славне: и яве всегда наслаждаяся обожения, украшаем
и мучением сияя, и ангел показуяся чистейшим причащением. Тем тя чтим,
и любовию празднуем твое священнейшее торжество достоблаженне.
Стих: Праведник яко финикс процветет, яко кедр иже в ливане, умножится.
Железом окован, непреткновенно стезю шествовал еси преподобне, к небесному
граду ведущую, честными ранами, Владимире, всемудре якоже утварию обложен.
В негоже вшед яко победитель истиннейший, и мученик непобедим, и священнодейственник
священнейший, поеши со ангелы песнопение божественное чисто: Свят, Свят,
Свят,Троице единосущая.
Стих: Насаждени в дому Господни, во дворех Бога нашего процветут.
Восходный степень Церковь стяжа, священныя твоя подвиги, священномучениче,
Владимире, юже и храниши незыблему, и ненаветну от волков державных, проповедающую
доблести твоя и величающую твоя страдания, яже за Христа законно пострадал
еси блаженне.
Слава Отцу и Сыну и Святому Духу.
Глас 9
В Церковь небесную священно вшел еси, священно обливаем блаженне кровию,
и Троице предстоиши, богатно сияя оттуду блистании истекающими пребогате.
Темже днесь, Владимире, твою память светоносную совершающе, чувствия души
просвещаем.
И ныне и присно, и во веки веков. Аминь.
Богородичен воскресный. Аще ли не празднуеши, глаголи сей Богородичен:
Тучами Духа Пресвятаго Пречистая, мою мысль ороси, яже каплю рождшая Христа,
неизчетно безмерная беззакония человеков, щедротами измывшую: изсуши источник
страстей моих, и потока мя сподоби пищи живыя присно, молитвами Твоими.
Крестобогородичен:
На Кресте Тя яко узре пригвождена Господи, Агница и Мати Твоя дивляшеся,
и что видение сие взываше, Сыне возжеленне; сия Ти неверный собор воздаде
беззаконный, иже многих Твоих чудес насладивыйся; но слава неизглаголанному
сошествию Твоему, Владыко.
Тропарь во уставе: аще ли несть устава, глаголи сей тропарь, глас 9
И нравом причастник, и престолом наместник апостолом быв, деяние обрел
богодухновение, в видении восход: сего ради слово истины исправляя, и
веры ради пострадал еси даже до крове, священномучениче, Владимире, моли
Христа Бога спастися душам нашим.
Слава Отцу и Сыну и Святому Духу, и ныне и присно, и во веки веков. Аминь.
Богородичен, или Крестобогородичен.
На утрени, на Бог Господь, тропарь тойже. По 1 й кафисме седален,
глас 3. Подобен: Божественныя веры:
Морем веры исповедания, прелести угасил еси злославие, обличив идольское
безбожие, и всесожжение божественное быв, чудотворением озаряеши концы,
отче преподобне, Христа Бога моли, даровати нам велию милость. ( Дважды)
Слава Отцу и Сыну и Святому Духу, и ныне и присно, и во веки веков. Аминь.
Богородичен:
Божественнная скиния была еси Слова, едина Пречистая Дево Мати, чистотою
ангелы превозшедшая, паче всех мене персть бывша, осквернена плотскими
прегрешенми, очисти молитв Твоих божественными водами, подающи Чистая
велию милость.
По 2 й кафисме седален, глас 4. Подобен: Явился еси днесь:
Возсияв якоже солнца заря, блистаеши преподобне всему миру светло, учении
твоими богогласе, Владимире, светоносне, мучеником похвало. ( Дважды)
Слава Отцу и Сыну и Святому Духу, и ныне и присно, и во веки веков. Аминь.
Богородичен:
Пречистыя руки Твоя Дево Мати, простерши, покрый уповающыя на Тя, и Сыну
Твоему зовущыя: всем подаж Христе Мати Твоя.
По Хвалите имя Господне, припев:
Величаем тя священномучениче, Владимире, и чтем святую память твою: ты
бо молиши за нас Христа Бога нашего.
Псалом избранный: Услышите сия вси языцы:
По полиелеи седален, глас 8.Подобен: Премудрости:
Окормляем силою вседетельною, и ветрилом окрилям крестным, легко преплыл
еси житейскую бурю, и к божественным пристанищем воистину достигл еси,
добродетелей куплю многу стяжав, юже Владыце всех принесл еси, и еже благий
рабе, слышал еси, и сим поледующая: темже,Владимире, блаженне, моли Христа
Бога, грехов оставление подати чтущым любовию святую память твою. ( Дважды)
Слава Отцу и Сыну и Святому Духу, и ныне и присно, и во веки веков. Аминь.
Богородичен:
В напасти многоплетенныя впад, от враг видимых и невидимых, бурею одержим
безчисленных согрешений моих, и яко к теплому защищению и покрову моему
Чистая, и пристанищу притекаю Твоея благости. Темже Пречистая, из Тебе
воплощенному безсеменно молися прилежно о всех рабех Твоих, непрестанно
молящихся Тебе Богородице Пречистая, молящи Его присно согрешений оставление
даровати, воспевающым достойно славу Твою.
Степенна, 1 й анифон, 4 го гласа.
Прокимен:
Ч естна пред Господем смерть преподобных его.
Стих:
Что воздам Господеви о всех, яже воздаде ми; Всякое дыхание:
Евангелие священномученику.
По 50 м псалме стихира, глас 4:
Сосуд священ Духа Святаго был еси, душу очистив от страстей священне:
отсюду божественное помазание святое приял еси, святитель ты быв, и наставник
людей богомудрых, и мученик непобедим, нас ради страсти претерпевшаго,
и безстрастие источившаго,страдальче, Владимире.
Канон, глас 2. Песнь 1.Ирмос:
Грядите людие, поим песнь Христу Богу, рездельшему море, и наставльшему
люди, яже изведе из работы египетския, яко прославися.
Христовым светолитием просвещаем, священномучениче славне, Владимире,
молитвами твоими преблаженне, омраченную душу мою просвети, яко да воспеваю
тя.
Просвещением спасительнаго проповедания, чистому сердцу твоему, яко зерцало
нескверное отче возсияв, лучи всем испустил еси.
Постом твоим страстная играния вся, и воздержанием желания претворил еси,
и различными подвиги взялся к безстрастней высоте.
Богородичен:
Бога из Тебе воплощшагося свемы, без семеннаго хотения, сущаго прежде
всея твари, и прежде всех век: темже тя сущую Богородицу воспеваем.
Песнь 3. Ирмос:
Утверди нас в тебе Господи, древом умерщвей грех, и страх твой всади в
сердца нас поющих Тя.
Всесовершенну жертву живу, себе Христу принесл еси мучением, совестию
мученическою, преди пострадав воздержанием.
Управив богоразумно преподобне ум твой заповедьми Спасовыми, достоин явился
еси, и веры поборник непобедимый.
Богородичен:
От мертвости ум наш отрясла еси, рождши сущее безсмертие, и одежду нам
изткала еси нетления Девице, рождеством Твоим.
Седален, глас 3.
Божественным Духом просвещен, свирепство мучителей дерзновением пастырским
священномучениче, велемудренно посрамил еси: и превезся прелести пучину,
ко пристанищу божественному достигл еси, отче преподобне, Христа Бога
моли даровати нам велию милость.
Слава Отцу и сыну и Святому Духу, и ныне и присно, и во веки веков. Аминь.
Богородичен:
Кийждо идеже спасается, токмо праведно и притекает: и кое иное таковое
прибежище, яко Ты Богородице, покрывающее душы наша.
Крестобогородичен:
Жезл силы стяжавшии, Крест Сына Твоего Богородице, тем низлагаем врагов
шатания, любовию Тя непрестанно величающе.
Песнь 4. Ирмос:
Услышах Господи славное твое смотрение, и прославих Человеколюбче, непостижимую
твою силу.
Всесожжение божественное ты, и чиста жертва принеслся еси Спасу всех,
священномучениче премудре.
Стадо Христово преподобне, наставляя к свету богоразумия, безбожия тьму
отгнал еси.
Безбожия глубину, рекою твоих потов отче, яко священномученик, изсушил
еси.
Богородичен:
Просвети Пречистая,омраченную душу мою, светом Твоим, яже свет рождшая
един ипостасный.
Песнь 5. Ирмос:
Света подателю и веков Творче Господи, во свете Твоих повелений настави
нас: разве бо Тебе иного Бога не знаем.
Богатство и славу светлую, и долготу жизни, и живот нетленен, истинная
премудрость Христос, тебе дарова блаженне,яко изрядне Того возлюбльшу.
Жезлом веры отгоняеши ересей ловитвы, и союзом любве спряг стадо твое,
надеждею и верою сохроняеши невредно.
Отразив воздержанием пищу, накормил еси душу твою, пищу имея непрестанныя
молитвы и поучение, и еже к Богу возносящее смирение.
Богородичен:
Тя заступницу Чистая и надежду тверду и державу и покров, и стену стяжахом
вси, и в Царство небесное вводящий мост.
Песнь 6. Ирмос:
В бездне греховней валяяся, неизследную милосердия твоего призываю бездну:
от тли Боже мя возведи.
Жертва и жритель быв, пожерл еси себе Богу веры ради: и соблюдаеши безсквернено
Тому, служительства твоего совершение.
Умертвился еси богоглаголиве миру всему, единому же Богу жив пребывая,
ко Христу преставился еси, животом нетленным обогощаем.
Ныне в безконечную славу прешед от земли, окоянную душу мою страстьми,
преподобне прилежным очищением твоея молитвы уврачуй.
Богородичен:
Вземлющаго грехи всего мира, Пречистая Христа заченши, Пренепорочная,
не престай просящи грехов прощения рабом Твоим.
Кондак во уставе; аще ли несть устава глаголи сей кондак, глас 4.
Подобен: Вознесыйся на Крест:
Во святителях благочестно пожив, мучения путь прошед, идольския угасил
еси жертвы, и поборник быв твоему стаду богомудре. Темже тя почитающе
тайно вопием ти: от бед избави ны присно твоими мольбами, отче наш, Владимире.
Икос:
Верно любовию совокупльшася в память священнаго страдальца, и сего песньми
восхвалим днесь,яко да благодати от него насладимся: душы бо спасает от
страстей и бед, яко мученик, и яко верен святитель, и поборник молящих
его от души. Темже вопием ему: от бед избави ны присно твоими мольбами,
отче наш, Владимире.
Песнь 7. Ирмос:
Образу златому на поли деире служиму, трие Твои отроцы небрегоша безбожнаго
веления, посреде же огня ввержени, орошаеми пояху: благословен еси .Боже
отец наших. Премудрости чаша явился еси добродетели исполнена, и созвав проповеданием
высокаго жития Твоего стадо Твое, сие управил еси Богомудре, и с Ним отче
взываеши: благословен Бог отец наших.
В храмы тамо сущыя в жилище честно достигл еси, со ангелы водворяяся,
и с ними отче ликуеши. Темже тя чтуще преблаженне, со дерзновением зовем:
благословен еси Бог отец наших.
Блажен еси, и добро ти есть ныне водворившуся, идеже праведных воинства,
идеже мученическая селения, идеже премудрых апостол лицы вопиют: благословен
Бог отец наших.
Богородичен:
Ты едина Богу, всяческая мудростию Создавшему, Мати позналася еси неискусобрачная,
Дево Пречистая. Темже бгагочестно взывающе глаголем: благословена яже
Бога плотию рождши.
Песнь 8. Ирмос:
В пещь огненную ко отроком еврейским снизшедшаго, и пламень в росу преложшаго
Бога, пойте дела яко Господа, и превозносите во вся веки.
Священнодействовав благочестно Христову службу тайную, словесное овча
сам принеслся еси Ему, жертва приятна и благоугодна, всесовершаема кровию,
преблаженне.
Священства одежду делы твоими премудре украсив, явился еси целомудрия
ключарь, воздержания пища истинная, молитвы учитель, покаяния наставник,
и закон жизни.
Предложению время, покаянию плод присно предлагаем, и смоковница неплодная
посечением претит: душе моя, проклятия убойся, восприими же Христа, благоплодие
добродетельное.
Богородичен:
Не презри заступнице страшная, гласа раб Твоих, и от всякия беды и прещения
лютого, Дева Святая всех исхити: преклоняет бо Бога матерняя молитва Твоя.
Песнь 4. Ирмос:
От Бога Бога слова, неизреченною мудростию пришедшаго обновити Адама,
ядию в тление падшаго люте: от Святыя Девы, неизреченно воплотившагося
нас ради, вернии единомудренно песньми величаем.
Увадил еси отче различная вражия стрелы, огнем воздержания, и чистоты
углием плотскую попалив тину, истинныя тамо сущия светлости преславно
сподобился еси.
Светоносная твоя отче возсиявши память, просвещает души благоговейно сию
совершающих досточудне, и причастники Божия света явленно сих совершает:
юже достойно богомудре песньми величаем.
Венец носяща тя отче, и почесть победы приимша от Божия десницы, и подвиги
сканчавша, и света исполншася Божия, верующе вернии, ко Христу молебника
тепла тя предлагаем.
Богородичен:
Яко Богородицу тя Дева и Матерь слова, ходатаицу сущую нам, присносущнаго
Божия живота, и правды солнца возсиявшую нам, вернии единомудрено песньми
величаем.
Светилен. Подобен: Небо звездами:
Яко священномученик, вязати и решати имеяй власть, разреши зол моих союз,
и к любви Божией причти мя, и Царствия причастника блаженне соделай молитвами
твоими.
Богородичен:
Просвети Чистая душу мою грехи потемневшую, и вечнующаго мя пламене и
мрака избави ходатайством Твоим, яко да с веселием хвалю Твое величие.
Подобен. На хвалитех стихиры, глас 4.: Дал еси знамение:
Благодать духовная, Владимире, отче тебе возсиявши, светло просвети тя:
отсюду умали страстную нощ, и безстрастия день постиже, чисте чистейшему
свету совокуплься. О немже жительствуя, не забуди богогласе священномучениче,
верою поющих память твою. ( Дважды)
Благодать желанную священномучениче, Владимире, нося небесную, земленыя
же не брегл еси: сего ради яко безплотен, страдальческое избрал еси житие,
яко присносущнаго потока пищи благонасладитеся хотя, богоприятне: и слезами
изсушил еси мутный источник страстей, и напоил еси душепищныя класы.
Тело приобидел еси ураняемое биенми, и огню приближаемое: ум бо вперил
еси непобедимым желанием, прекрасною добротою Божественного Рачителя,
Егоже сладким уязвися желанием, мучеников удобрение, святителей украшение,
страдальче, Владимире, ангелов собеседниче.
Слава Отцу и Сыну и Святому Духу, Глас 4
Нов сад якоже маслина, на Божией трапезе положился еси, яко сын ходящих
по пути Господню: мучения ради благослови тя Господь, и узриши благая
вышняго сиона, наслаждаяся божественного радования со всеми святыми, священномучениче,
Владимире, достойнопетый, имже общники нас быти, мольбами твоими сотвори.
И ныне и присно, и во веки веков. Аминь.
Богородичен:
Богородице всех Царице, православных похвало, еретичествующих шатания
разори, и лица их посрами, не кланяющихся, ниже чтущих Пречистая честный
твой образ.
Крестобогородичен:
Распинаема видящи, и в ребра прободаема копием, Пречистая, Христа Человеколюбца,
плакаше вопиющи,: что сие Сыне Мой; что Тебе неблагодарнии люди воздаша,
вместо яже сотворил еси добрая им, и тщишися безчадствовати Мя вселюбезнейше;
дизлюся благоутробне, Твоему вольному распятию.
Аще имать Славу на стиховне, глаголи вечерний: И ныне и присно, и во веки
веков.
Аминь. Богородичен, или крестобогородичен.
|
назад
| на главную | форум
